Utangulizi
Biashara ya juice ya matunda ni miongoni mwa biashara nzuri sana rahisi zaidi kuanza na yenye soko la uhakika hasa maeneo ya mjini
Lakini pia hata sehemu za vijijini unaweza kuuza juice kwa matunda rahisi yanayo patikana kama limao na kupata wateja
Biashara hii hutumia mtaji kidogo sana kuanzisha kama tayari una vifaa muhimu kama mashine ya kusaga juice (blander) na Friji (jokofu)
Lakini pia sio lazima kuwa na mashine ya kusaga juice, unaweza kuuza aina nyingine ya juice ambazo hazihitaji mashine kusaga
Mfano juice ya Limao ni rahisi sana kutengeneza bila mshine ya kusagia pia malimao ni rahisi sana kupatikana mahala popote
Pia sio lazima kuwa na Friji unaweza kuanza kuhifadhi kwenye deli linalotunza ubaridi kisha kuweka mabarafu yaliyogandishwa.
Juice ya matunda mbali mbali hupendwa sana na watu wengi hivyo uhakika wa kupata wateja ni mkubwa ikiwa utatengeneza juice bora
Kuna aina nyingi za juice ya matunda lakini nchini Tanzania zimezoeleka juice kama Embe , Machungwa na Parachichi au Miwa,
Zipo juice za Limao na matunda mengine yote lakini wengi hawazifahamu wala kuzitumia kwenye biashara zao kwa uwingi
Hivyo kama utakuwa mbunifu kuanza na aina tofauti ya juice uhakika wa soko ni mkubwa sana kwa nchi kama Tanzania
- Eneo la kuuzia ( unaweza kuuzia hata nyumbani)
- Friji (Unaweza kutumia hata deli)
- Mashine ya kusagia ( sio lazima kwa juice zote)
- Vifungashio (Glasi au chupa)
- Chujio la juice
- Mirija ya kunywea juice (Sio lazima kama unatumia chupa)
- Sukari (Sio kwenye kila juice)
- Ladha ( kwa baadhi ya juice kama limao na sio lazima)
Mambo Ya Kuzingatia Kwenye Biashara Ya Juice Ya Matunda
- Usafi wa hali ya juu sana hasa kama unatumia machupa ya kawaida kuwekea juice , lakini pia muonekano wako binafsi na vifaa vingine vyote ikibidi tumia gloves wakati wa kuandaa na kuuza
- Ubora wa juice ,epuka kutumia matunda mabovu kuuzia juice kwa lengo la kubana matumizi pia usijaze maji zaidi kwenye juice
- Utamu na ladha nzuri, tengeneza juice tamu sana na yenye ladha ya kipekee
- Uhifadhi wa ubaridi , asilimia kubwa ya wateja hupenda juice baridi sana na isiyo ganda zaidi
- Bei yenye uhalisia, uza kwa bei kulingana na kipato cha wanunuaji .
Mambo Mengine Ya Kuzingatia Kwenye Biashara Ya Juice Ya Matunda
- Uchaguzi wa eneo sahihi lenye uhitaji mkubwa
- Ubunifu wa ziada yani kutengeneza juice zenye ladha ya kipekee
- Kutochanganya juice iliyolala na juice mpya
- Kutotumia chupa zilizotupwa mitaraoni au kwenye takataka
- Jifunze mara kwa mara ubunifu mpya na aina nyingi zaidi tofauti tofauti za juice na faida zake.
Changamoto Za Juice Ya Matunda
Licha ya kuwa na faida nyingi sana pia juice ya matunda ina changamoto nyingi ambazo zinaweza kuleta hasara kama:
- Uharibifu wa haraka , Ni rahisi sana kwa juice hizi kuharibika na kupoteza ladha yake hata kama itahifadhiwa kwenye friji kwa siku kadhaa yaani inapaswa kuisha haraka
- Mgao wa umeme hasa kwa nchi kama Tanzania huweza kupeleke hasara kubwa sana ya juice
- Gharama kubwa za umeme hasa kwa wanaokaa nyumba za kuchangia umeme kutokana na matumizi ya mashine na friji ya mara kwa mara
- Ushindani mkubwa kutoka kwa wauzaji wengine hivyo lazima kuwa mbunifu na kujua jinsi ya kujitofautisha
- Kupotea kwa msimu wa matunda hivyo jitahidi kutouza juice ya aina moja ili wateja wazoe aina tofauti tofauti
- Kupanda na kushuka kwa bei ya sukari ,hapa jaribu kuuza juice ambazo hazihitaji sukari nyingi sana kutengeneza.
Biashara Ya Juice Ya Matunda Kwa Wasio Na Mitaji
Kama huna mtaji au una mtaji kidogo unaweza kuanza kuuza juice kwa kuanza na ulicho nacho kwanza
Ikiwa pia huna mashine ya kusaga anza na juice kama Limao au machungwa kamua kwa mkono wako au kamulio maaalumu la juice
Changanya Limao au ndimu kwa ladha kama NANAA bila kusahau sukari kiasi kisha weka kwenye friji au deli lenye barafu zilizogandishwa
Tumia chupa zilizoisha maji ila zioshe kwa maji ya moto na sabuni kwanza ili kuua wadudu na kuzifanya ziwe safi zaidi
Anza kuuzia nyumbani au tembeza mitaani na sehemu mbali mbali zenye mzunguko wa watu wengi
Baada ya kupata wateja na soko endelea kutanua biashara yako taratibu taratibu kwa kununua vifaa na mahitaji ya msingi unayotaka
Kisha unaweza kuanza kutengeneza aina nyingine ya juice za matunda tofauti tofauti kidogo kidogo na hata kuajiri wasambazaji
Na mwisho kabisa unaweza kufungua eneo maalumu la kuuza juice aina zote na vitafunio kadhaa kulingana na uhitaji.
Biashara Ya Juice Ya Matunda Kwa Wenye Mitaji Mikubwa (Juice Bar)
Kama una mtaji mkubwa wa kutosha unaweza kufanya biashara hii kwa namna ya tofauti na ukubwa zaidi
Tafuta eneo zuri sio lazima liwe kubwa sana ila liwe na muonekano wa kuvutia na utulivu kiasi yani pawe na mandhari safi
Weka viti vizuri na meza ndogo za kuvutia wateja bila kusahau mapambambo yenye kuhamisha unywaji wa juice
Zingatia uwepo wa sehemu za kuchajia simu na ukiweza weka mziki laini wa pole pole sana bila makelele mengi
Usafi na mvuto wa hali juu utavutia wateja wenye kipato kizuri na mauzo makubwa kuliko yale ya mitaani
Ajiri wafanyakazi wachache wasafi, wenye mvuto na tabasamu muda wote yaani wakarimu na wanaojua kumtumikia mteja
Jitangaze kila mahala hata kwenye mitandao ya kijamii ili kufikia watu wengi zaidi ikiwezekana weka huduma ya kumpelekea mteja wa karibu
Zitangatia zaidi kutengeneza juice freshi yani ya papo hapo kulingana na mteja anavyotaka na zile juice za kawaida kwa wateja wasiotaka juice maalumu
Unaweza kuongeza thamani ya biashara hii kwa kuweka vitu kama karanga au hata korosho kama kisusio kwa wateja wako.
Hitimisho
Biashara ya juice ya matunda ni biashara inayoweza kuendesha maisha na kusaidia kutimiza malengo kwa kiwango kikubwa sana
Inategemea namna unavyoipa thamani na kujituma kutafuta wateja mara kwa mara bila kuchoka
Hakuna biashara isiyo na changamoto wala nyepesi sana kufanyika, kila biashara inataka moyo na kujitoa.
NB: Gharama za ununuzi wa vitu vyote, bei ya kuuza na hata faida haijatajwa kutokana na utofauti wa mazingira kwa kila mmoja
Kupata ushauri wa kina kuhusu biashara hii bonyeza link hii.
