Utangulizi
Usafi wa nyumba ni moja kati ya biashara nzuri yenye faida kubwa sana na rahisi kuanza kwa wasio na mtaji kabisa na wenye mtaji
Biashara hii inahusisha kutoa huduma ya usafishaji wa mazingira ya nyumba ndani , nje na kila kinachohusika katika nyumba
Biashara hii haina ugumu sana wala mambo mengi sana kuanza zaidi ya nguvu zako na maarifa kidogo ya usafi
Kila mmoja anajua namna ya kusafisha nyumba yake kwahio inahitaji jitihada ndogo sana kuweza kuifanya biashara hii na kukupa jina.
Uzuri ni kuwa soko lake ni kubwa sana hasa maeneo ya miji mikubwa na sehemu zilizochangamka
Kwa maana kuwa ubize wa watu katika majukumu ya kila siku umefanya kuhitaji watu wa kuwasafishia nyumba zao mara kadhaa
Hivyo kama ukiweza kupata watu kadhaa wa kuanza nao uhakika wa soko ni asilimia mia maana nyumba huchafuka mara kwa mara
Huhitaji kuwa na kitu chochote kuanza zaidi ya nguvu zako tu , Vifaa unaweza tumia vya mteja na bado ukaingiza pesa nzuri.
Lakini pia unaweza kuanza ukiwa na mtaji wako kwa kununua kila kitu na kuiendesha kwa namna unayotaka na ukapata faida
Unaweza endesha kama mtu mmoja, washirika na hata kampuni kabisa inategemea na kiwango cha mtaji wako
Aina Za Usafi Wa Nyumba
- Usafi wa kawaida ambao unahusisha kufanya usafi wa nyumba nzima lakini kwa juu juu au sehemu zinazoonekana
- Usafi wa ndani zaidi ambao unafanyika kwa kusafisha kila kitu lakini kwa umakini zaidi na kutoa uchafu wote hata sehemu zisizo onekana mfano uvunguni mwa kitanda nk
- Usafi wa kitu maalumu huu sasa unachagua kufanya usafi wa kitu kimoja tu lakini kwa kiwango cha juu zaidi mfano usafi wa vyoo pekee au madirisha pekee nk
Unaweza kuchagua aina moja ya usafi unayoiweza sana au kufanya aina zote kulingana na matakwa ya mteja
Kwakuanza na kwa ambae hana mtaji aina ya ya kwanza na ya pili zinafaa kwakua hazihitaji uzoefu mkubwa , matumizi ya dawa kali, vifaa vingi wala ujuzi wa ziada
Huduma ya usafi inaweza kufanywa katika nyumba mpya kabla ya kuhamia, nyumba ya zamani , nyumba kubwa au hata chumba kimoja
Usiogope kabisa ni huduma inayowezekana na imezoeleka katika maisha yetu pia haina ushindani mkubwa nchini Tanzania.
Usafi Wa Nyumba Umejumuisha Vitu Gani?
Unaposema usafi wa nyumba maana yake usafi wa mazingira yote yanayo izunguka nyumba husika nje na ndani
Kwa kuhusisha sehemu kama
- Ardhi au sakafu
- Madirisha
- Paa la nyumba
- Thamani za ndani kama Makabati, viti nk
- Vyombo
- Vyoo
- Masinki
- Ukuta wa nyumba NK
Kwahio unaweza kuanza huduma hii hata sasa hivi na ukapata faida kubwa kama utaamua kuifanya kwa heshima na kuipa thamani.
Unawezaje Kuanza Usafi Wa Nyumba Ikiwa Huna Mtaji?
Inawezekana kabisa kwa asilimia mia moja kuanza bila mtaji kabisa na kufanikiwa Biashara ya usafi wa nyumba muda wowote
Hatua za kuanza bila mtaji kabisa
- Weka malengo ya biashara yako
Haijalishi udogo utakao anza nao kitu cha msingi ni kuweka malengo ya baadae ya biashara unayoanza na andika mpango wa biashara
- Weka nia ya dhati na dhamira
Unapaswa kuwa na nia kutoka moyoni bila nia na dhamira itakuwa ngumu sana kuanza kwa kujitoa au kujituma
- Tafuta wateja
Anza na watu wanao kuzunguka mabachela,majirani, mtaaani ,marafiki nk yani watu ambao unahisi wana uhitaji
- Ongea na wateja
Ukipata mtu mwambie huduma yako unayotoa lakini kubaliana nae bei ya punguzo kwa sababu utatumia vifaa vyake
- Panga bei kulingana na kazi
Unaweza kupanga kwa masaa au siku au kwakuangalia kazi husika lakini zingatia punguzo na usiwe na tamaa
- Fanya kwa ubora na ubunifu
Ili kukuza jina na kupata wateja zingatia ubunifu wa hali ya juu sana ambao utakutofautisha na wengine usiripue kazi
- Endelea kujitangaza
Kila siku usione aibu kupita kwenye nyumba kuuliza wateja wapya unaweza kutumia simu yako kujitangaza kwenye mitandao
- Tumia faida kununua vifaa vyako
Kila unapopata malipo hakikisha unabaki katika mpango wako wa biashara na kunua vitu kidogo kidogo unapaswa kuheshimu malengo yako
- Shirikiana na wengine
Wateja wakiwa wengi usiwe mbinafsi , unapaswa kujitanua kwa kutafuta mtu mwenye nia kama yako ili mshikirikane kuhudumia
- Jiboreshe kila siku
Usifanye mambo kienyeji, Sajili biashara kama kampuni ndogo, nunua vifaa vizuri ndani ya uwezo na anza kujitoa kama mfanyakazi na achia wengine wasafishe.
Hakuna Jambo Gumu Wala Jepesi
Kimsingi hatua hizo sio rahisi kama zilivyo andikwa na wala sio ngumu kama unavyowaza kichwani, kila kitu kinataka muda
Weka nia na jitihada bila kusahau nidhamu hakika utaweza , hata kama utachelewa lakini haitokuwa sawa na kukaa bila kazi.
Hakuna mafanikio makubwa marahisi sana wala sio lazima uteseke sana ndio ufanikiwe , bali mafanikio ni pamoja na matumizi sahihi ya akili na nguvu kiasi
Ikiwa utaamua kulala ndani kungoja muujiza ni sawa na ukiamua kuanza kwa hatua ndogo pia ni sawa yaani maamuzi yapo ndani ya mtu mwenyewe
Biashara Ya Usafi Wa Nyumba Kwa Wenye Mitaji
Siwezi kusema ni mtaji kiasi gani unatosha kuweza kufanya biashara hii maana kwa upande wangu mtaji unaweza kuanza hata kwa Elfu thelathini na kuendelea
Kwahio unaweza kuwa hata na milioni tano , chini au zaidi ya hapo inategemea aina ya vifaa unavyotaka kuanza navyo
Aina ya vibali na usajili, ukubwa wa matangazo, wingi wa wafanyakazi na hata ukubwa wa ofisi na eneo utakalo anzia biashara
Kitu cha msingini ni kufanya uchunguzi wa kila unachotaka kwanza kabla hujaamua kiwango cha pesa unachohitaji
Biashara ya usafi wa nyumba ukiwa na mtaji mzuri maana yake hata uendeshaji utakuwa rahisi zaidi.
Vifuatavyo ni baadhi ya vifaa unavyoweza kuanza navyo kulingana na idadi au matakwa yako wakati wa kuanza
- Fagio
- Mopu
- Sabuni
- Dawa za usafi aina mbali mbali
- Usafiri wa gari ( sio lazima sana)
- Brashi za kusugulia
- Ndoo
- Chupa za usafi
- Mifuko ya uchafu
- Gloves
- Sare za wafanyakazi
- Mashine za kufyonza vumbi
- Vitambaa vya kufuta vumbi NK
Hivyo ni baadhi ya vifaa ambavyo unaweza kuanza navyo na unaweza kuongeza taratibu kwa baadae lakini pia idadi inategemea na uhitaji wako binafsi
Namna Ya Kuanzisha Kampuni Ya Usafi Wa Majumbani Kwa Wenye Mitaji
- Fanya uchunguzi wa soko na ushindani wa kampuni zilizopo sokoni
- Andaa mpango wa biashara yako na malengo kamili bila kusahau makadirio ya mapato, faida, changamoto nk
- Weka chapa ya biashara yako kuanzia awali (brand)
- Sajili biashara yako kama kampuni ili kupata tenda nzuri na kuaminika bila kusahahu vibali husika
- Tafuta ofisi sehemu rahisi kufikika na weka mpangilio unaotaka ndani yake
- Ajiri wafanyakazi idadi unayotaka kuanza nayo wenye uzoefu wa kutosha kutoka kampuni zingine
- Jitangaze kwa njia za kisasa zaidi Mitandaoni, Redio , tv kulingana na mtaji ulionao pia unaweza weka website au app kwa ajili ya kurahisisha oda za wateja wa mbali
- Hudumia wateja kwa kiwango cha juu sana ili kuweka ladha ya kampuni yako
- Jiboreshe kila siku kwa kufanya mabadiliko kulingana na matakwa ya wateja , kujua jinsi ya kukuza biashara soma hapa
KUMBUKA unaweza kufanya haya kulingana na kiwango cha mtaji wako kwa maana kuwa unaweza kufanya chini ya hapo au zaidi ya hapo.
Mambo Ya Kuzingatia Katika Biashara Ya Usafi Wa Nyumba
- Uaminifu wa hali ya juu na kama utaajiri wafanyakazi jiridhishe udhamini wao kwanza maana wanaweza chukua kitu kwenye nyumba ya mteja
- Ubunifu mkubwa mfano baada ya usafi unaweza panga vitu katika mpangilo mzuri hata kama mteja hajakuambia
- Matumizi ya dawa sahihi , jitahidi kuchukua tahadhari kubwa kwenye dawa zenye kemikali
- Uvumilivu na uendelevu, hupaswi kukata tamaa mapema maana soko linaweza kukua taratibu kulingana na ushinandani wa eneo ulilopo na hupaswi kukata tamaa.
Hitimisho Na Maswali Yanayoulizwa Mara Kwa Mara
Kufanikiwa inategemea jitihada na ushindaji eneo husika lakini angalau wastani wa mwaka mmoja mpaka miwili kwa wenye mitaji na zaidi ya miaka miwili kwa wasio na mitaji
Unaweza anzia brela na kufuata hatua zote kisha TRA na baadae utaenda Halmashauri kuchukua leseni ya biashara
Inategemea juhudi binafsi na ubunifu, lakini njia za kisasa ni mitandao ya kijamii na kulipia ads kuanzia dola moja kwa siku.
