Utangulizi
Kuishi na watu vizuri ni jambo la lazima linapokuja suala la ujenzi wa amani ya mtu mmoja mmoja na jamii nzima
Hapa Duniani kila mmoja ana tabia zake ambazo ni tofauti na mtu mwingine kwa namna mbali mbali
Utofauti wa tabia ndio chanzo cha kukosana na changamoto kati ya mtu mmoja na mwingine au kikundi cha watu
Kila mmoja ameumbwa kwa namna ya utofauti kuanzia muonekano mpaka ndani ya akili na fikra
Kama vilivyo vidole kuwa havifanani kimuonekano au alama za vidole zilivyo tofauti kwa kila mmoja
Ndivyo hata akili ,hisia, uwezo wa kuchanganua mambo na hata fikra zilivyo tofautiana baina ya watu Duniani
Watu wote wana haki ya kuishi maisha waliyo chagua wenyewe bila kuingiliwa na mwingine ikiwa hawavunji sheria.
Mzunguko wa maisha ya kila siku unaambatana na muingiliano wa watu wa aina mbali mbali haijalishi mazingira
Hakuna sehemu ambayo watu wanakosekana bila kujali ubaya na umbali wa mazingira Dunia nzima
Lakini pia mahitaji ya maisha yanalazimisha muingiliano wa watu kwa namna mbali mbali sehemu zote
Hakuna namna yoyote kuwa mtu anaweza kuishi mwenyewe na kuweza kuendesha maisha yote bila kuchangamana kabisa.
Maisha Ni Watu
Ladha ya maisha iko kwenye muingiliano na watu kwenye maeneo mbali mbali hata kama sio muingiliano wa moja kwa moja
Muingiliano tofauti tofauti wa watu ndio huleta ladha ya maisha kwenye kila jambo bila kujali ni jambo gani
Umuhimu wa kuwa na watu upo kwenye maeneo yote kuanzia kwenye mahitaji muhimu ya maisha
Hivyo basi mtu mmoja hawezi kukamilisha maisha peke yake pasi na uhitaji wa wengine kwenye maisha yake
Haimaanishi mahusiano yanayogusa mtu moja kwa moja kama rafiki, familia au hata mahusiano ya kimapenzi
Bali mzunguko wa watu wengine kwenye maeneo mbali mbali kwenye maisha na mahitaji ya mtu yoyote
Kwahio maisha ni watu na kuishi na watu vizuri sio kitu cha hiari bali ni kitu cha lazima ili kuleta ustawi bora.
Amani, furaha na utulivu wa mtu mmoja mmoja huanzia kwenye namna anavyo ishi na watu wengine
Hakuna namna ya kuwa na furaha au amani ikiwa kuna changamoto baina ya jamii inayo mzunguka mtu
Kujenga heshima na kuheshimika pia huanzia miongoni mwa watu na namna bora ya uhusiano kati yao.
Kwanini Kuna Umuhimu Wa Kuishi Na Watu Vizuri?
Kama tulivyoona kuwa kuishi na watu ni jambo lisiloepukika kwa namna yoyote ile kwa mtu yoyote yule
Sasa kuna ulazima wa kuishi na watu vizuri haijilishi wana umuhimu gani au wapo eneo gani na hudumu kwa muda gani,
Hivyo kuna sababu nyingi sana ambazo zinaambatana na ulazima wa kuishi na watu vizuri kama zifuatavyo
- Kujenga amani kuanzia kwa mtu binafsi mpaka jamii nzima
- Kuleta hali ya utulivu na afya ya akili
- Kuleta furaha kwa mtu mmoja mmoja na jamii nzima
- Kuondoa migogoro isiyo ya lazima
- Ustawi bora wa maisha kwenye jamii nzima na mtu mmoja mmoja
- Kujenga na kuleta maendeleo kwa mtu mmoja mmoja na Jamii nzima
- Kujenga ushirikiano na mshikamano baina ya watu NK
Kwanini Kuna Migogoro Baina Ya Watu
Tukiondoa vyanzo vikuu viliwi ambavyo watu wengi hupambana sana kuvipata kama Pesa na mahusiano (familia)
Vyanzo hivyo ndio haswa vikuu na vinavyo leta migogoro kwenye maisha na jamii za watu Duniani lakini Pia,
Migogoro baina ya watu husababishwa na mambo mengine mengi sana moja wapo ni utofauti wa tabia kati ya mtu na mtu
Kila mmoja ana tabia zake ambazo hupishana na mwingine kwa namna mbali mbali na kupelekea migogoro
Pia utofauti wa imani mbali mbali kuanzia imani za Dini ,ukabila , mila na desturi mbali mbali baina ya watu
Utofauti wa uwezo wa kufikiri na kuchanganua mambo mbali mbali pia ni sababu inayopelekea migogoro
Bila kusahau utofauti wa mazingira na makuzi ya watu wa aina mbali mbali kupitia mazoea baina yao
Na pia kuna utofauti wa kiwango cha kipato na uwezo wa kumudu gharama za maisha huchangia migogoro
Matamanio na matarajio kati ya mtu na mtu pia ni chanzo cha migogoro kwenye jamii za watu mbali mbali
Lakini pia kuna sababu nyingi sana ambazo huchangia migogoro kati ya watu kwenye jamii kila siku.
Namna Bora Ya Kuishi Na Watu Vizuri
- Tengeneza amani yako kwanza
Kabla ya watu wengine hakikisha wewe binafsi una amani ya kutosha ndani ya nafsi yako kwanza
- Weka mipaka yako na iheshimu
Hakikisha kuwa unajua kipi hupaswi kuruhusu wengine waingilie bila kujali uhusiano wako na wao
- Tambua na heshimu mipaka ya wengine
Kama ambavyo unataka kuheshimika kwenye mipaka yako pia ni lazima kuheshimu mipaka ya watu wengine
- Jiheshimu na heshimu wengine
Anza kujiheshimu wewe binafsi na wengine watafuata kisha waheshimu na wao bila kujali kipato na umri wao
- Soma tabia za watu
Kila mmoja ana tabia zake tofauti na sio rahisi kubadili tabia za watu ikiwa hawajataka hivyo lazima kuzijua tabia za wengine kisha kuishi kwa kufuata tabia zao
- Beba majukumu yako
Kuanzia majukumu ya maisha binafsi , ya kazi na familia kwa asilimia mia moja na yale ya jamii inayokuzunguka unapohitajika
- Elewa nafasi yako kwa wengine
Usijipe umuhimu ambao hujapewa ,ishi kwa kujua nafasi yako kwenye maisha yao na baki kwenye mpaka huohuo
- Samehe haraka na acha mambo madogo madogo yapite
Usiwe mtu wa kushikilia kila kitu,mengine fanya kama huyaoni na zingatia mambo muhimu pekee
- Usilazimishe watu kukuelewa sana
Sio kila mtu ataelewa unacho amini wewe wala huwezi amini na kuelewa kama wengine hivyo baki na imani yako na wape nafasi wabaki na imani zao
- Tenda haki na saidia wengine
Zingatia haki sawa kuliko sababu zingine za upendeleo yani ishi kwa kuwapa watu haki zao pale inapotakiwa
- Zuia hisia mbaya
Hasa pale unapopatwa na hali ya kuchukia ,usiwe mwepesi kujibu na kutaka kuonekana mshindi au mjuaji.
Hitimisho
Kuishi na watu vizuri ni jambo lenye afya sana kwenye maisha maana lina gusa maeneo yote muhimu
Changamoto za maisha asilimia kubwa huletwa na watu katika harakati za hapa na pale kwahio ,
Ili kupata amani na furaha suala la kujifunza namna bora ya kuishi na watu haliepukiki kabisa.
Kuna watu wakorofi sana, wajuaji, wabishi, waongo,wachonganishi au hata wambea na tabia nyingine nyingi
Wote wamechangamana na wengine wengi na kila mmoja akiwa na tabia yake tofauti na mwingine.
Licha ya hayo pia Biaadamu hakuna mkamilifu hata mmoja yani kila mmoja ana madhaifu yake hata kama awe mwema vipi
Kuna namna tu hata mwenye tabia njema huwa na aina yake ya madhaifu mabaya ambayo hujificha bila kuonekana kwa haraka
Hivyo basi ni muhimu kuepuka maumivu na migogoro isiyo ya lazima kwa kuzingatia kuwa watu hawafanani,
Kuna jambo huwa baya sana kwa mtu fulani au jamii fulani ila likawa la kawaida sana kwa watu na jamii nyingine
Utofauti wa mitazamo na namna ya kuyafurahia maisha pia unapaswa kuzingatiwa ipo tofauti kati ya mtu na mtu
Maisha ni matamu na mazuri sana ikiwa utaamua kuyaelewa na kuyapa tafsiri yako bila kuingilia wengine.
